BRS: బీఆర్ఎస్‌కు మహారాష్ట్ర జనరల్ సెక్రటరీ రాజీనామా... ఎన్సీపీలో చేరిక
- అజిత్ పవార్ నేతృత్వంలోని ఎన్సీపీలో చేరిన మాణిక్ రావు కదం
- అసెంబ్లీ ఎన్నికల్లో పరాజయం తర్వాత నెలలుగా అధినాయకత్వం మౌనం....
- కేంద్ర నాయకత్వం నుంచి దిశానిర్దేశం లేకపోవడంతో రాజీనామా చేసినట్లు వెల్లడి
తెలంగాణ అసెంబ్లీ ఎన్నికల్లో ఓటమి తర్వాత బీఆర్ఎస్ నుంచి పలువురు ముఖ్య నేతలు ఇతర పార్టీలలో చేరుతున్నారు. ఇప్పుడు పక్క రాష్ట్రంలోనూ ఆ పార్టీకి ఎదురుదెబ్బ తగిలింది. మహారాష్ట్ర బీఆర్ఎస్ పార్టీ జనరల్ సెక్రటరీ పదవికి మాణిక్ రావ్ కదం రాజీనామా చేశారు. ఆ తర్వాత ఆయన అజిత్ పవార్ నేతృత్వంలోని ఎన్సీపీలో చేరారు. ఆయనకు ఎన్సీపీ రైతు సంఘం అధ్యక్షుడిగా అవకాశం ఇచ్చింది.
మాణిక్ రావు కదంతో పాటు పలువురు బీఆర్ఎస్ నాయకులు కూడా ఎన్సీపీలో చేరారు. ఈ మేరకు వారు బీఆర్ఎస్ అధినాయకత్వానికి లేఖ రాశారు. తెలంగాణ అసెంబ్లీ ఎన్నికల్లో ఘోర పరాజయం తర్వాత నెలల తరబడి అధినాయకత్వం మౌనం, కేంద్ర నాయకత్వం నుంచి ఎలాంటి దిశా నిర్దేశం లేకపోవడంతో తాము తమ రాజకీయ భవిష్యత్తు కోసం ఈ నిర్ణయం తీసుకున్నట్లు పేర్కొన్నారు.
